2025銅鑼灣最新吃喝玩樂攻略
- annayeung928
- 9月1日
- 讀畢需時 4 分鐘
銅鑼灣一直都係香港最熱鬧嘅商業區之一，集合左購物、美食與娛樂於一身。2025年的銅鑼灣依然魅力不減，傳統與現代元素完美融合，為遊客同本地人提供豐富多彩嘅體驗。以下係銅鑼灣最新嘅吃喝玩樂指南，帶你探索呢個充滿活力的區域！
美食篇：味蕾嘅盛宴
La Volta - 8月新開意大利風味餐廳
喺銅鑼灣蘭芳道新開嘅 La Volta，呢間店由米芝蓮主廚 Roland Schuller和餐飲達人Jeffrey Mui 主理，主打正宗手工意粉同意大利菜。成間舖用木枱石牆做主調，再襯返少少綠色植物，坐喺度食飯就好似去咗意大利小鎮度，暫時忘記咗自己仲喺繁忙嘅銅鑼灣。宜家仲支持online booking，有興趣可以去佢地ig度book位~甘就可以唔洗等甘耐~
-Grilled Spanish Octopus
章魚燒得外脆內嫩，表面微焦但唔會燶，咬落去軟軟彈彈又唔會韌。
-Egg Raviolo
大到成碟咁大嘅一件雲吞！外皮煙韌有蛋香，切開嗰陣流心蛋黃同埋濃郁芝士即刻流出嚟!!
-Chitarra alla Gamberi
呢款意粉特別掛汁~啲虎蝦鮮甜多汁，海鮮蕃茄汁濃縮咗所有鮮味，酸酸地又帶微辣，食落開胃又回味。
三道菜都係水準之作，值得一試！
La Volta
人均消費：$200-400
地址：銅鑼灣蘭芳道9號地舖
Lunch：12:00 | Dinner：18:00
馬泰 - 泰國菜+馬來西亞菜
呢間主打馬泰菜嘅人氣店鋪！店內裝修充滿馬來西亞同泰國特色，好有feel。餐牌選擇豐富，各種馬泰美食應有盡有，但最吸引人係佢哋嘅$98原隻波士頓龍蝦喇沙，呢個價錢真係抵食到爆！
隻龍蝦上枱嗰陣非常吸睛，碗大大隻，仲附送手套同鉗，等你可以輕鬆享用。龍蝦肉質彈牙厚實，蟹鉗位特別濃味，配埋喇沙湯食簡直完美。最驚喜係隻龍蝦仲有好多膏，攪落湯度令成個喇沙更加香濃。
喇沙湯底做得好出色，椰香濃郁，辣中帶香，唔會太稀，料又足夠，絕對係高質素嘅喇沙！想食平靚正嘅龍蝦喇沙，絕對值得一試！
馬泰
人均消費：$50-100
地址：銅鑼灣駱克道408號地舖
營業時間：11:30-21:45
初麥手作烘焙 - 特色麵包店
好多人係Threads推介既爆紅麵包舖！宜家得銅鑼灣同北角有分店~
原味麻糬布丁($12)真係驚喜之作！外層麻糬麵包煙韌有嚼勁，咬開即刻爆出濃濃蛋香。入面嘅布丁餡滑嘟嘟，甜度啱啱好唔會漏，食落層次感十足，啱晒鍾意甜品嘅朋友。
朱古力版本($12)就更加吸引！Cocoa麻糬皮包住濃郁黑朱古力布丁，咬開嗰下布丁慢慢流出嚟，濃郁中帶有微微苦香，完全唔會甜膩，反而令人越食越想食。
最奢華嘅係杜拜開心果麻糬布丁($14)，用咗杜拜進口嘅開心果醬，一開袋已經聞到陣陣果仁香。Q彈麻糬皮包住滑滑布丁同香濃開心果醬，絕對係罪惡系甜點嘅頂峰！
三款都超值得一試，愛甜品嘅你千祈唔好錯過啊！
初麥手作烘焙
人均消費：$50以下
地址：銅鑼灣軒尼詩道475號地下E號舖
營業時間：08:00-20:00
點樣買到平靚正？銅鑼灣購物攻略
日本3coins - 平價雜貨
日本平價雜貨店3COINS終於開到黎銅鑼灣希慎廣場!!呢間以300日圓為主打價嘅日本人氣店，香港定價會同日本同步，最平只需$18起。店內產品種類繁多，由家居用品、旅行用品到電子產品同時尚配飾都有齊，要留意嘅係，熱門產品好快賣晒，特別係新款到嘅時候。另外，假日人比較多，如果唔想迫，最好平日去~
地址：銅鑼灣軒尼詩道500號希慎廣場B1及B2
崇光百貨SOGO
作為香港最著名嘅百貨公司之一，SOGO樣樣都齊，由潮流服飾、美妝護膚品到家居用品，應有盡有！特賣期嘅人龍場面震撼，幾乎全城瘋狂，絕對係shopping愛好者嘅天堂！想一站式shopping又想搶平貨，SOGO絕對係你嘅首選！
地址:銅鑼灣軒尼詩道555號
玩樂篇：少遊客知道嘅好去處
銅鑼灣避風塘
避風塘睇日落！原來喺市區都可以見到靚景，黃昏時分，金黃色嘅天空映襯停泊喺避風塘嘅遊艇同漁船，畫面好有feel！最方便係呢個地方好易去，交通方便，所以每日黃昏時分都有好多人嚟呢度放鬆，欣賞香港市區難得嘅自然美景！想睇日落又唔想去太遠嘅話，呢度絕對係個好選擇！
銅鑼灣天后廟
天后廟，呢間歷史悠久嘅廟宇專門供奉海上守護神天后娘娘，廟內建築充滿中國傳統特色，古色古香！想感受香港傳統文化氣息，感受下本地宗教習俗，就一定要嚟呢度行下！
地址：銅鑼灣電氣道
Miris Spa 岩石按摩專門店
去左甘多地方行到腳都攰，Miris Spa絕對係放鬆天堂！一入門口陣陣香薰已經令人心情放鬆，仲有私人VIP房私隱度高。呢度提供超過30款按摩服務，岩鹽熱石、草本暖宮、淋巴排毒樣樣齊，仲可以配埋facial做套餐添！最正係佢哋嘅按摩師同美容師都係經驗豐富嘅專業人士，服務態度一流。想徹底放鬆一下，絕對值得試下呢間隱世spa！
地址:銅鑼灣軒尼詩道489號銅鑼灣廣場一期19樓01室
(銅鑼灣港鐵站B出口)
